Əlavə 4

Azərbaycan Respublikası Prezi­dentinin 2005-ci il 20 aprel tarixli 226 nömrəli fərmanı ilə təsdiq edilmişdir.

Azərbaycan Respublikasının Kənd Təsərrüfatı Nazirliyi yanında Dövlət Fitosanitar Nəzarəti Xidməti haqqında

ƏSASNAMƏ

I. Ümumi müddəalar

1. Azərbaycan Respublikasının Kənd Təsərrüfatı Nazirliyi yanında Dövlət Fitosanitar Nəzarəti Xidməti haqqında (bundan sonra Dövlət Xidməti) Azərbaycan Respublikası Prezidentinin «Aqrar bölmədə idarəetmənin təkmilləşdirilməsi tədbirləri haqqında» 2004-cü il 23 oktyabr tarixli 467 nömrəli Sərən­ca­mına əsasən yaradılmışdır.

2. Dövlət Xidməti bitki mühafizəsi və karantini, pes­tisidlərin, bioloji preparatların, digər bitki mühafizə vasitələrinin istifadəsi sahəsində dövlət nəzarətini həyata keçirən icra hakimiyyəti orqanıdır.

3. Dövlət Xidməti öz fəaliyyətində Azərbaycan Respubli­kasının Konstitusiyasını, Azərbaycan Respublikasının qanun­larını, Azərbaycan Respublikası Prezidentinin fərman və sərən­camlarını, Azərbaycan Respublikası Nazirlər Kabinetinin qərar və sərəncamlarını, Azərbaycan Respublikasının tərəfdar çıxdığı beynəlxalq müqavilələri, Azərbaycan Respublikası Kənd Təsər­rüfatı Nazirliyinin normativ hüquqi aktlarını, əmr və qərarlarını və bu Əsasnaməni rəhbər tutur.

4. Dövlət Xidməti bu Əsasnamədə nəzərdə tutulan vəzifə və funksiyalarını bilavasitə və Azərbaycan Respublikasının müvafiq icra hakimiyyəti və yerli özünüidarəetmə orqanları ilə, ictimai təşkilatlarla və digər hüquqi şəxslərlə əlaqəli şəkildə həyata keçirir.

5. Dövlət Xidməti müstəqil balansı, qanunvericiliyə uyğun olaraq sərəncamında olan dövlət əmlakına, xəzinə və bank hesablarına, Azərbaycan Respbulikasının dövlət gerbinin təsviri, Azərbaycan Respbulikası Kənd Təsərrüfatı Nazirliyinin və öz adı əks olunmuş möhürə, müvafiq ştamplara və blanklara malikdir.

6. Dövlət Xidmətinin saxlanılması xərcləri Azərbaycan Respublikasının dövlət büdcəsinin vəsaiti hesabına maliyyələş­dirilir.

7. Dövlət Xidməti Bakı şəhərində yerləşir.

II. Dövlət Xidmətinin əsas vəzifələri

8. Dövlət Xidmətinin əsas vəzifələri aşağıdakılardır:

8.1. qanunvericiliyə müvafiq olaraq bitki mühafizəsi və karantin sahəsində dövlət nəzarətini həyata keçirmək, bu sahədə qanunvericiliyin pozulması hallarının aradan qaldırıl­masına yönəldilmiş tədbirlər görmək;

8.2. bitkiçilikdə pestisidlərin, bioloji və başqa preparat­ların tətbiqi qaydalarını müəyyən etmək, bitki mühafizəsi üzrə normativ sənədlərin layihələrini hazırlamaq;

8.3. torpaq mülkiyyətçiləri və torpaq istifadəçiləri tərəfindən kimyəvi, aqrotexniki, bioloji, təşkilatı və digər tədbirlərin aparılmasına, bitki mühafizə vasitələrinin istifadəsi reqlamentinə riayət olunmasına nəzarəti həyata keçirmək;

8.4. karantin obyekti mənbələrini vaxtında aşkar etmək, onların təcrid edilməsi və ləğvi üçün tədbirlər görmək;

8.5. Azərbaycan Respublikasının ərazisinə karantin ob­yekti olan bitki zərərvericilərinin, xəstəlik törədicilərinin və alaq bitkilərinin daxil olmasına nəzarət etmək;

8.6. qanunvericilikdə nəzərdə tutulmuş digər vəzifələri yerinə yetirmək.

III. Dövlət Xidmətinin əsas funksiyaları

9. Dövlət Xidməti qanunvericiliklə müəyyən edilmiş vəzifələrə uyğun olaraq aşağıdakı funksiyaları həyata keçirir:

9.1. Azərbaycan Respublikasının ərazisində karantin obyekti olan bitki zərərvericilərinin, xəstəlik törədicilərinin və alaq otlarının geniş yayılmasının qarşısını almaq, onların mənbə­lərini ləğv etmək üçün karantin və qanunvericiliklə müəyyən edilmiş digər məhdudiyyətlərin qoyulması barədə müvafiq icra hakimiyyəti orqanları qarşısında vəsatət qaldırır;

9.2. karantin obyektlərinin siyahısını hazırlayır, müəy­yənləşdirilmiş ərazidə fitosanitar karantin rejimini tətbiq edir, karantinin qoyulması və götürülməsi barədə təkliflər verir;

9.3. Azərbaycan Respublikasının ərazisində bitkilərin ziyan­verici və xəstəliklər, habelə alaq otları ilə sirayətlənmə dərəcəsini, onların əmələgəlmə səbəblərini müəyyənləşdirmək məqsədilə müşahidələr aparır;

9.4. qanunvericiliyə müvafiq olaraq pestisidlərin və digər preparatların idxalına və ixracına öz səlahiyyətləri daxilində nəzarət edir;

9.5. karantin nəzarətində olan yüklərin idxalı və ixracı za­manı aşkar olunmuş karantin orqanizmlərinin zərərsizləş­diril­mə­si (fumiqasiya) tədbirləri görür;

9.6. karantin nəzarətində olan bitki və bitki mənşəli məh­sul­ların, meşə və dekarativ (bəzək) bitkilərin toxumlarının, əkin materiallarının, bitkilərin və onların hissələrinin (çilik, ting, soğanaq, kök yumruları, meyvələr və s.), karantin obyektlərini yaya bilən digər bitki mənşəli məhsulların ölkəyə gətirilməsinə və ölkədən çıxarılmasına, yaxud Azərbaycan Respublikasının əra­zisindən tranzit daşınmasına idxal karantin icazəsi və fito­sanitar sertifkatı verir.

9.7. qanunvericiliklə müəyyən edilmiş qaydada dəniz, çay limanları ərazilərində, hava limanlarında, dəmir yol stansiyalarında, poç­tamptlarda elevatorlarda, anbarlarda, gəmilərdə, sərnişin qatar­la­rın­da, mülki təyyarələrdə, kənd təsərrüfatı bitkilərinin əkin sa­hələrində, təcrübə, elmi-tədqiqat, sort-sınaq sahələrində, təsər­rüfatlarda, həyətyanı sahələrdə, tingliklərdə, üzümlüklər­də, dağ­larda, çoxillik əkmələrdə, otlaqlarda, meşə qoruqlarında, ti­ca­rət, emal müəssisələrində və digər bitki karantin obyekt­lərində karantin yoxlanışlar aparır;

9.8. ölkəyə gətirilən və ölkədən aparılan karantin nəza­rətin­də olan məhsulların, o cümlədən baqajlarda, poçt bağlama­larında və sərnişinlərin əl yüklərində gətirilən bitki mənşəli məhsulların, habelə nəqliyyat vasitələrinin karantin yoxlanışını və laboratoriya ekspertizasını aparır;

9.9. pestisidlərin və bioloji vasitələrin istehsalına, saxlan­ma­sına, satıışına və tətbiqinə, eləcə də zərərli kimyəvi maddə­lərin bütün növ bitkiçilik məhsullarında, yemlərdə, yem əlavə­lə­rində və torpaqda qalıq miqdarına dövlət nəzarətini həyata keçirir;

9.10. bitki mühafizəsi sahəsində, habelə pestisidlərin, bioloji preparatların və digər bitki mühafizə vasitələrinin toksi­koloji təsiri, ətraf mühitin çirklənməsi, keyfiyyətlərini itirmiş və istifadəsi qadağan olunmuş kimyəvi maddələrin zərərsizləş­dirilməsi məsələlərində aidiyyatı dövlət strukturları ilə birgə fəaliyyət göstərir;

9.11. Karantin zonasından Dövlət Xidmətinin icazəsi ol­madan çıxarılmış karantin nəzarətində olan yüklərin geri qayta­rılmasını, zərərsizləşdirilməsini və qanunvericiliklə müəy­yən edilmiş qaydada məhv edilməsini həyata keçirir;

9.12. pestisidlərin, aqrokimyəvi maddələrin, bioloji və di­gər preparatların dövlət sınağının, qeydiyyatının aparılmasında və istifadəsinə icazə verilmiş preparatların siyahısının hazırlan­masında iştirak edir;

9.13. bitki mühafizəsi haqqında təlimat və tövsiyələrin, pestisidlərin, bioloji və digər bitki mühafizə vasitələrinin saxla­nıl­ması, daşınması və istifadəsi texnologiyasının və reqla­ment­lərinin pozulması barədə akt və təqdimatları təqsirli şəxlərin Azər­­baycan Resrublikasının qanunevriciliyi ilə nəzərdə tutul­muş qaydada məsuliyyətə cəlb edilməsi üçün səlahiyyətili döv­lət orqanlarına göndərir;

9.14. Dövlət Xidmətinin fəaliyyəti üzrə ayrılmış büdcə vəsaitinin məqsədli istifadəsi üçün müvafiq proqramlar və xərc smetaları tərtib edir və Azərbaycan Respublikasının Kənd Təsərrüfatı Nazirliyinə təqdim edir;

9.15. büdcə vəsaitinin istifadəsi barədə müəyyən olunmuş qaydada Azərbaycan Respublikasının Kənd Təsərrüfatı Nazirli­yinə hesabat verir;

9.16. işçilərinin peşəkar hazırlığının və ixtisaslarının artı­rıl­ması ilə bağlı zəruri tədbirlər həyata keçirir;

9.17. Azərbaycan Respublikasının ərazisində kənd təsər­rü­fa­tında dövlət karantin və bitki mühafizə tədbirlərinin elmi-praktiki əsaslarla həyata keçirilməsini təmin edir;

9.18. səlahiyyətləri daxilində xarici ölkələrin müvafiq qurumları və beynəlxalq təşkilatlarla müəyyən olunmuş qaydada qarşılıqlı əlaqələr qurur;

9.19. qanunvericiliyə müvafiq olaraq xidmətin fəaliyyət dövründə yaranmış arxiv sənədlərinin komplektləşdirilməsini, saxlanmasını, üçotunu və istifadəsini təşkil edir;

9.20. qanunvericiliklə nəzərdə tutulmuş digər funksiaya­ları həyata keçirir.

IV. Dövlət Xidmətinin hüquqları

10. Dövlət Xidməti bu Əsasnamə ilə müəyyən edilmiş vəzifələri yerinə yetirmək və funksiyaları həyata keçirmək üçün aşağıdakı hüquqlara malikdir:

10.1. qanunvericiliklə müəyyən olunmuş hallarda və qay­dada müvafiq fəaliyyət sahələrində ekspertiza, tədqiqat, qiymət­ləndirmə işlərinin aparılmasını, nümunələrin götürül­mə­sini, baxış və nəzarət altında olan materialların və obyektlərin yox­la­nılmasını həyata keçirmək;

10.2. fitosanitar fəaliyyəti sahəsində qanunvericiliyin pozul­masının qarşısını almaq məqsədilə hüquqi və fiziki şəxs­lərə qanunvericilikdə nəzərdə tutulmuş qaydada məhdudiyyət, xəbərdarlıq və digər profilaktik tədbirlər tətbiq etmək;

10.3. sanitariya, gigiyena qaydalarına və təhlükəsizlik tex­nikasına uyğun olmayan anbarlarda və satış yerlərində bitki mü­hafizə vasitələrinin saxlanılmasını və satışını qadağan etmək;

10.4. mülkiyyət formasından və tabeliyindən asılı olma­ya­raq müəssisələrin, təşkilatların və təsərrüfatların torpaqla­rında, kənd təsərrüfatı məhsulları, toxum və əkin materialları saxla­nılan anbarlarda, həyətyanı sahələrdə, fərdi və kollektiv bağ və bos­tan sahələrində fitosanitar vəziyyəti qanunvericiliklə müəy­yən edilmiş qaydada yoxlamaq;

10.5. mülkiyyət formasından və tabeliyindən asılı olma­yaraq müəssisələrdən, təşkilatlardan, torpaq mülkiyyət­çilərin­dən və istifadəçilərindən əkin sahələri və çoxillik əkmələrin, meşələrin, otlaqların və biçənəklərin toxum və əkin mate­rial­larının fitosanitar vəziyyəti, habelə ziyanverici, xəstəlik və alaq otlarına qarşı aparılan mübarizə tədbirləri haqqında lazımi məlumatların verilməsini tələb etmək;

10.6. gömrükxanaların, dəmir yol stansiyalarının, avto­vağzalların, hava, dəniz və çay limanlarının poçtamptların müdi­riy­yətindən qanunvericiliklə müəyyən edilmiş qaydada karantin tətbiq edilən yüklər barədə məlumat tələb etmək və həmin yüklərin sənədləri ilə tanış olmaq;

10.7. qanunvericiliyə uyğun olaraq dövlət sınağından keç­mə­miş, qeydə alınmamış, habelə istifadəsi qadağan olunmuş pesti­sidlərin və digər bitki mühafizə preparatlarının istehsalının, satışının və ölkəyə gətirilməsinin qarşısının alınması üçün qanunvericiliklə müəyyən edilmiş tədbirlər görmək;

10.8. bitki mühafizəsi və karantini sahəsində qanun­ve­riciliyin pozulmasına görə vəzifəli şəxslərin, hüquqi və fiziki şəxs­lərin məsuliyyətə cəlb olunması üçün qanunvericiliklə müəy­yən edilmiş qaydada müvafiq tədbirlər görmək;

10.9. Dövlət Xidmətinin fəaliyyəti üzrə ayrılan məqsədli budcə vəsaitinə sərəncam vermək;

10.10. qanunvericiliklə nəzərdə tutulan digər hüquqları həyata keçirmək.

V. Dövlət Xidmətinin fəaliyyfətinin təşkili

11. Dövlət Xidmətinə Azərbaycan Respublikası kənd tə­sərrüfatı nazirinin təqdimatı ilə Azərbaycan Respublikasının Pre­zidenti tərəfindən vəzifəyə təyin olunan və vəzifədən azad edilən rəis rəhbərlik edir.

12. Rəis Dövlət Xidmətinə həvalə edilmiş vəzifələrin yerinə yetirilməsinə şəxsən məsuliyyət daşıyır.

13. Dövlət Xidməti rəisinin təqdimatına əsasən, Azər­baycan Respublikasının kənd təsərrüfatı naziri tərəfindən və­zifəyə təyin olunan və vəzifədən azad edilən iki müavini vardır.

14. Dövlət Xidmətinin rəisi:

14.1. Dövlət Xidmətinin işini təşkil edir və ona rəhbərlik edir;

14.2. müəyyən edilmiş əməyin ödənilməsi fondu və işçi­lərin say həddi daxilində Azərbaycan Respublikası Kənd Təsər­rüfatı Nazirliyi ilə razılaşdırmaqla Dövlət Xidməti aparatının ştat cədvəlini və tabeliyində olan müəssisə və təşkilatların xərc sme­talarını təsdiq edir;

14.3. Dövlət Xidmətinə daxil olmuş təkliflərə, vətən­daşların ərizə və şikayətlərinə müvafiq qaydada baxır;

14.4. Dövlət Xidməti aparatının işçilərini və səlahiyyətləri daxilində tabeliyində olan müəssisə və təşkilatların rəhbərlərini vəzifəyə təyin edir və vəzifədən azad edir, barələrində qanun­ve­riciliklə müəyyən edilmiş qaydada həvəsləndirmə və intizam tənbehi tədbirləri görür;

14.5. səlahiyyətləri daxilində müvafiq vəzifələrin yerinə ye­ti­rilməsi üçün Dövlət Xidmətinə ayrılmış məqsədli büdcə vəsaitinin təyinati üzrə istifadəsi proqramlarını və xərclər smetalarını təsdiq olunmaq üçün Azərbaycan Respublikasının Kənd Təsərrüfatı Nazirliyinə təqdim edir;

14.6. səlahiyyətləri daxilində müvafiq vəzifələrin yerinə yetirilməsi üçün Dövlət Xidmətinə ayrılmış vəsaitin xərclən­məsinə dair hesabatları Azərbaycan Respublikası Kənd Təsər­rüfatı Nazirliyinə təqdim edir;

14.7. tabeliyində olan təşkilatlarda mühasibat üçotu və hesabatı işlərinin düzgün aparılmasına nəzarət edir;

14.8. tabeliyində olan təşkilatlara səlahiyyətləri daxilində icrası məcburi olan əmrlər və göstərişlər verir;

14.9. Dövlət Xidmətini bütün dövlət və ictimai təşkilat­larda, idarə və müəssisələrdə, məhkəmələrdə vəkalətnaməsiz təmsil edir.

15. Fitosanitar nəzarəti sahəsində aparılan elmi tədqi­qatların istiqamətləri üzrə məsələlərə baxılmaq və təkliflər ha­zırlamaq, müasir elmi nailiyyətlərin tətbiqi üzrə tövsiyələr hazırlamaq məqsədilə Dövlət Xidmətində tərkibi alim və mütəxəssislərdən ibarət Elmi-Texniki Şura yaradılır.

16. Dövlət Xidməti işçilərinin müəyyən edilmiş qaydada fərqləndirici nişanı olan geyim forması və xüsusi vəsiqələri vardır.